وغاب العيد
ودق العيد بيبان الناس إلا احنا
ماعاذ الله ياسيدى
يجينا عيد فى غيابك
ياساكن كل مطرحنا.
ودق العيد وجاب للناس جلابيه
وشملة خير
وانا اللى وحدي مشنيه
وغير الغير
اموت واصرخ واقول فينك ماترجع عاد
ياك انت خلاص ماراجعشي؟!!!
وجع قلبي يكفي الكون لو اتفرق
بقيت مكسورة من غيرك
عليلة ،عويلة ،وشقيه
فى شبرين مي يادوب أغرق
يا مر الآااه على المكتوب لما يحكم
على العشاق بكاس الموت تتشوق!!!
تعال وشوف أحوالي
منين أجيبه كاس الصبر ياغالي
فى كل مكان ليك ذكرى فى قلب البيت
هنا كنا بنتشاور، هنا كنا بنتحاور
هنا شوقتني ياما وليك حنيت
هنا كنا على الطبلية بنقوت أمانينا
هنا حاربنا أوهامنا وعدينا
هنا بنينا محرابين
واحد لله فى قلب الليل يجمعنا
امام عادل وراه صليت
وواحد كان لعيالنا ، تعلمهم صلاح الدين والدنيا
سامحت كتير وكنت كبير من يومك
وياما غلطنا من غير قصد قدامك
وياما بقصد صلحت الغلط فينا
وياما كتير كتير عديت.
واقولك ايه ؟!
واعيدلك ايه ؟!
ماشاخت كل ايامي
ولفتني ليالى الخوف
ومات الفجر قدامي
بقيت عميا قليلة الشوف
لكن مغصوبة اتبسم فى وش اعيالك الغاليين
أخاف ايشوفوا جوا عيوني كسرتهم
يهون عمرى ولا إني افرط عُقد لمتهم
انا يوم غبت ،غبت معاك
لكن عهدى امام الله لكمل حلم يوم عشناه
بأن اولادنا يبقوا أساس وعمدان نور
مابين الناس
يقولوا عاش ولا ماتشي
سايب من بعده رجاله لها القوله
كما أبوهم.....
مابين الخلق عاش قامه وله هيبه
ومات نبراس.
ايمان العطيفي
