جالنا الخبر
عربية ميري
داخلة البلد
جواها الولد
ملفوف بالعلم
وزفة ميري
و بروجي ... انتباه
سلام للشهيد
سلام سلاح
وواحد وعشرين طلقة
تنادي حي على الكفاح
زرعنا أخويا
بذرة خضر
في حضن ساقية
لجل ما ينبت مكانه
ألف شهيد
يا بختكم... ابنكم
انكتبله عمر جديد
ها يعيش شهيد
امي دموعها سيل
حلفت .. لنوريهم الويل
أبويا هد الصوان
مافيش عزا
تارنا عند العدا
ناخده .. وبعدين العزا
وسط الجنود
على الحدود
في جيش أحمس
من ست سنين
منتظرين جوه خندق
رابط على الزناد
واللقمة معفرها التراب
أمتى يجي الميعاد
قصاد عيني
أحفاد الملاعين
هكسوس فوق أرضنا
متهنيين... فاكرين
مفيش قومة تاني
للمصريين
الله اكبر .. الله اكبر
كان القرار
سمع الجنود
أمي بتنده
وسط النهار
وقت التار
وانطلق الشرار
رجال من نار
عبروا القنال
ومسكت عساف
شاف ف عيني
تار اخويا .. خاف
ما بنعملش زيكم
ما بنقتلش اسير
بارليف السد
قدامنا اتهد
ورفعنا الراية
ومعاها الهامة
زغردت أمي
قلعت السواد
خلاص يا ولاد
غار العار
وايام المرار
أبوايا بكي ابنه الشهيد
النهارده عيد
نصب الصوان
خد العزا
بقلم: سيد جعيتم
جمهورية مصر العربية
ليست هناك تعليقات:
إرسال تعليق